「爹娘，孩兒喜歡Mia教」──「死都要比較」

 

「人比人，比死人」這句話有點老土，但又永恆是正確的。無論你是1歲或是80歲，總愛同人比較，或「被比較」。睇睇我身邊的奇人趣事吧：

 

1）受害者1號乃是1歲男嬰。爸爸問我：「係唔係BB食奶粉會大隻啲？我嗰friend個仔好肥、好大隻、好得意。但我嗰B好鬼細粒，我怕佢第日唔夠人『揪』，都叫我老婆唔好再畀佢食人奶，又唔聽，又話『有免費嘢唔食走去食貴嘢』，好鬼煩！」

 

爸爸呀爸爸，你生個仔出嚟係為咗第日同人隻揪的嗎？你嗰仔係唔肥，但唔係瘦到營養不良又有病，你咁都要擔心一番，係你自己有病就真。講到尾，你唔係怕個仔太細粒第日俾人蝦，而係怕佢唔夠肥令你「冇面」啫，對嗎？

 

2）受害者2號，1.5歲女嬰。媽媽叫BB同Auntie Mia講「Goodbye」。BB好乖，興奮地對我講「仆街」。媽媽極唔好意思講：「死啦，佢連Goodbye都講唔正，第日我怕佢啲英文會差過同學，讀唔到書升唔到大學，搵唔到份好工又搵唔到個好老公。可唔可以book定你幫佢補習？」

 

媽媽呀媽媽，BB今日講唔正「Goodbye」，唔等於佢中六考DSE時會對住考官講「仆街」的。人每日會不斷進步，你咁早睇死個女第日讀唔成書？唔好畀自己咁大壓力啦。

 

3）受害者3號，6歲小一的女孩。媽媽向我訴苦：「Mia，我個女第一次中文讀默都有85分，今次得5分，好大鑊。佢仲要好惡咁同我講：『老師話你一定要簽名㗎，唔簽的話後果會非常嚴重㗎。』佢完全冇悔意！上次85分老師已經打電話畀我知，話佢缺乏默書技巧，今次得5分我直情冇面帶佢返學。」

 

媽媽呀媽媽，幫我一個忙，我想認識那位老師，想向佢請教一下係咪每個學生都要拎100分先叫做「好學生」？85分都要被訓話？嗰個老師當年讀書又係咪每次都拎100分先成就到佢今日做老師嘅夢想？學生拎100分唔應該係佢教學嘅目標，反而鼓勵學生要不斷進步、再創高峰，先可令佢喺教學上得到最大嘅滿足感啊。

 

4）受害者4號，17歲的中五學生。我問：「點解你要嚟上補習班？」佢答：「我好憎同班考第二嗰個同學，成日得得戚戚，想打巴佢。我立志要考得好過佢，所以搵補習。不過我已經補過幾個老師，英文都仲係好屎。好sad。」

 

同學呀同學，從前海洋上有一個小浪，佢同大浪講：「你就好啦，咁大又咁高，我就弱雞到爆，so sad。」大浪安慰小浪：「唓！我同你一陣跌返落去，咪大家都係水，有咩分別？我都係靠頭先架大船行過我先有機會升得咁高啫，有咩好羨慕。」咪係囉，佢考第二，你考第二十，你同佢都係人，都係學生。今次佢考第二，可能因為遇到良師指點，推佢一把。而你今次考二十，唔代表永遠都係二十，當你又遇到貴人扶持，自己又出點力，下一個考第二嗰個咪係你囉。而嗰個「貴人」，咪就係「我」囉！

 

5）「自」害者5號，80歲的伯伯。有日我去酒樓嘆茶時，聽到隔離枱個伯伯叮囑個仔：「你要幫我訂定最好嘅棺木，要靚過你二叔嗰副，等我落到去可以繼續威比佢睇。我出殯嗰日，你唔好馬馬虎虎呀，我睇實你㗎！整豪啲，幫我請個人嚟破地獄，搵個專業啲㗎，幾錢都無所謂，唔好求其跳呀，比人笑我寒酸我返嚟摙死你。燒多啲金銀衣紙比我，有錢使得鬼推磨，我落到去都要收買吓啲鬼差。一定要燒大屋、靚車、iPhone、保鑣、司機、工人……」

 

當一個人「要面」要到做鬼都唔放過，你可以想像到佢過去80年來生活壓力何其大。善哉善哉！